Aliortukkat

Pisuusaartitat – oqaluttuat pisimasinnaasut

Naja Aviaajalu 7-nik 8-nillu ukiullit kisimiillutik angerlarsimapput. Qulleq ikeqattaalerpoq. Naallu qamikka-luarlugu nammineerluni ikeqqittarpoq. Tassanngaannaq matu nammineerluni ammariasaarpoq. Ersinermik iliuusissaarulluinnarput. Qularinngilluinnarpaat inimi aliortugaqartoq.

Aqqaluk 29-nik ukiulik unnuami iterpoq. Qerattarluinnarsimavoq nikeriarsinnaanani. Arriitsuaqqamik putsutut ittoq silaannakkut qalliartuaarpoq. Qalliartormat takusinnaalerpaa tassaasoq aanagigaluani toqunikoq.

 

Imaassinnaavoq angerlarsimafferni nassuiarsinnaanngisarnik pisoqarsimasoq. Immaqa misigisimavat takusaqarsimavutilluunniit, allaat isumaliulerlutit aliortukkamik siumuisimasutit. Annilaangatigisinnaavat taama pisoqaqqinnissaa. Apeqquterujussuanngorpoq – tamanna qanoq unitsinneqarsinnaava?

Ajortut nassaassaapput, tamanna Biibilimit assortorneqanngilaq. Ajortut ersinarsinnaapput tammartissinnaalluta killilersorlutalu.

Upperisamik nassuerummi oqartarpugut, upperalutigu timi makeqqikkumaartoq. Periarfissaqann-gilaq anersaatut timmeralaarluni timitaqanngitsumik takkuteqqinnissaq – ulluinnarni aliortukkatut taasakkatsitut.

Attaveqarfigigutsigit, aliortukkatut isumaqarfigisagut – asangaakkavut toqusortavut attaviginngisaannarpavut. Ajornerpaatut ajortoq attavigissavarput salluliorneranit tiguangaalluta, upperiua-rutsigu toqusimasortatta tarninga attavigalutigu. Taamaattumik oqaluffimmiit sakkortuumik mianersuutigeqquneqarpoq anersaat silarsuaannik attaviginninniarnissaq.

Amerlanertigut nassuiaruminaatsunik pisoqartillugu, erngerluni aalajangertoqartarpoq aliortugaasut. Amerlanertigut ilisimaarineqartarpoq sinnatortilluni, isumaqarnarsinnaasartoq eqqumasarlutik, sinik REM-imik taaneqartartoq (sinik oqitsoq) atortillugu. Allaat misiginartarpoq nikissinnaajunnaarsimalluni, kiisalu aamma misiginartarpoq piviusuunngitsunik misigisaqartarneq.

Aamma naliginnaasorujuuvoq, sakkortuumik aliasuuteqarnermi imaluunniit sakkortuumik nalaataqarsimatilluni, inuk tigusiatinnerulersarmagu misigitillugu amerlasuut aliortukkatut isigisinnaa-saannik.

Qanorluunniit pisoqarpat aliortortutut misigisattut aallaaviulluni, taava ikiorusuppatsigit misigisimasatillu pimoorullugit tigullugit. Kinaanernik isertuussilluinnarsinnaavutit, palasimi allaqattaaqa-tigisat nipangiussisussaatitaavoq, allatatillu tamarluinnarmik oqaluutereernermi nungusarneqartussaallutik.

Eqqaamassavat kuisimasuungavit Guutimullu naassaanngitsumik angerfiginnissimallutit. Ajortut attorsinnaanngilaatsit.

Soorlu Paalusi allattoq:

Qularinngilluinnarparami toqulluunniit inuunerulluunniit, inngililluunniit pissaneqaqataasaluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit pinngortitalluunniit allat avissaartissinnaanngikkaatigut Guutip asannissusianit Kristusi Jiisusimi Naalakkatsinni

Rom. 8:38-39

Qinnut

Guuti asasara

Ersiutigaara ajortup nassuiaruminaatsullu avatangeqqangaanga.

Eqqarsaatip tamatuma ersiortippaanga.

Ersinera uanit peeruk.

Uppernikkut nakussatsinnga, suulluunniit assarnit nusussinnaanngikkaanga.

Ikiunnga ersiornerup inuunera aqussanngimmagu.

Imaluunniit kiffaanngissusera killilersorlugu.

Allamik toqqorsimasannik ersiuteqavissoruma

Uannut saqqummersiguk

Illit peqatigalutit piareersimavunga annernartoq taanna isinnik takussallugu

Illimmi pigaatit pissaaneq naalannassuseq naassanngitsumik

Amen